(HKTVmall vs 士多 vs 百佳) 網購大PK, 邊間表現最高分?

2

香港人生活忙碌,打工仔嘅工時更以每週50個鐘冠絕全球!計樓價後又多一項記錄榮登全球第一,真係叻叻豬。

小編身邊好多朋友都係朝9晚8嘅上班一族,佢哋好多時收工後都無時間去逛超市,平時嘅屋企嘅柴、米、油、鹽等等都要靠網購嚟補貨。有見及此今日我睬姥姥就同大家分析下香港網上超市嘅優點缺點啦!

三大超市簡介

HKTVmall由香港電視網網絡主席王維基成立,目標成為香港最大型、「包羅萬有」嘅24小時網上購物商場,售賣超過270,000件本地及全球嘅貨品HKTVmall擁有一隊專業「抄價員」,每天四出搜尋各大連鎖店的價格,務求令HKTVmall嘅價格緊貼市場,更具競爭力。

hktvmall評價

Ztore 係傳統嘅香港「士多」,由英文Store翻譯過嚟,意思係店舖雖小,但產品十分多元化,帶有濃厚本土嘅特色。昔日嘅士多除咗會為熟客仔提供訂貨、送貨、賖帳服務外,仲有一種鄰里間守望相助嘅人情味,而傳統士多日漸式微,網上士多想保留呢種係現今大型連鎖超市無嘅野,令人情味延續落去。

Ztore評價

 

PARKnSHOP百佳超級市場係香港及澳門有超過290間連鎖分店嘅龍頭大佬,近年除咗大家由細見到大嘅百佳超級市場,仲多咗其他品牌例如TASTE、Fusion by PARKnSHOP、GREAT、Food le Parc、Gourmet及International by PARKnSHOP等等,提供更多選擇俾顧客。

parknshop評價

 

貨品種類比較

Ztore – 網除了主打香港本土品牌外,亦會進口日韓台泰商品,當中包括糧油雜貨、傳統蛋卷、曲奇、 原箱杯麵,可樂,津路及零食等10,000種貨品!

近年為了擴充客源亦於網站上售賣廚具小家電,文儀用具及家居產品,例如Burno多功能電熱鍋,DE’LONGHI咖啡機及抽濕機等。

產品數量: 約10,000款

 

PARKnSHOP – 提供過萬款本地同環球商品,包括餅乾、零食及糖果、家居用品、糧油雜貨、人氣嬰幼兒貨品!

百佳網店所售賣嘅貨品種類比起Ztore更全面,例如凍肉、鮮果、蔬菜、酒類、雪糕及乳製品等,選擇都較多。 如果想網上買餸的話,百佳網更能勝任。

產品數量: 約12,000款

 

HKTVmall – 提供嘅貨品種類繁多,目前提供約13萬件貨品,以本地網店嚟計係最多最齊! 無論係生活雜貨、零食、電子產品、廚具、傢俱、寵物用品、保健護理及旅行用品等均一應俱全。

產品數量: 約1,300,000款

 

HKTVmall貨品種類比較齊全,新貨都可以搵到。佢除咗普通食物仲有化妝產品、時尚服飾、玩具圖書等,我覺得似百貨公司多啲。其次就係百佳,本地品牌具多,可滿足日常需要,但新鮮感欠奉。最後係士多,佢貨品種類選擇唔算多,有啲熱賣貨品易無貨,當多個選擇俾自己。

本次測試之貨品種類比較結果: HKTVmall勝

 

價錢比較

維他檸檬茶250毫升x 6 黑人雙重薄荷牙膏 卡樂B 燒烤味薯片
HKTV mall $15.9 $27.9

(175克 x 2送75g牙膏)

$18.9@2包 (55G)

 

Ztore $15.9

($29.9@2件)

$37.9

(250克x 2送牙刷)

$ 15.9 (105G)

 

PARKnSHOP $15.9

($60.4@4件)

$26.2

(200克 x 2)

$$17@2包 (55G)

 

 

百佳係價錢上比較實惠,HKTVmall比士多價錢平少少。HKTVmall會有較多加購/組合優惠選擇,百佳以多買多優惠策略去貨,士多以原箱購買為主比較遜色。

本次測試之價格比較結果: Parknshop勝

 

送貨範圍/速度比較

商戶 送貨範圍
HKTV mall 香港島、九龍區、新界區、愉景灣、馬灣及東涌 (長洲、大嶼山、梅窩、貝澳、長沙、塘福、水口、石壁、寶蓮寺、大澳、香港國際機場及貨車未能直達的送貨地點除外)
Ztore 香港島、九龍區、新界區、東涌、馬灣、愉景灣及機場 (博覽館、長洲、迪士尼、坪洲、南丫島及任何管制區域及禁止貨車進入之地區除外)
PARKnSHOP 香港島、九龍區、新界區、愉景灣、馬灣、東涌及香港國際機場 (長洲、大嶼山、梅窩、貝澳、長沙、塘福、水口、石壁、寶蓮寺、大澳及貨車未能直達的送貨地點除外)

 

商戶 送貨速度 (由落單日31/5計起) 免運費門檻
HKTV mall 最慢 (5/6中午收貨) 滿$400
Ztore 最快 (3/6上午收貨) 滿$350
PARKnSHOP 尚可 (3/6中午收貨) 滿$500


三大超市送貨範圍都差唔多,離島地區唔包送貨。比較起送貨速度,三間超市就有好大分別。同一時間落單,Ztore最先送到,其次就係PARKnSHOP,包尾係HKTVmall。

本次測試之送貨速度比較: Ztore勝

 

評價及個人感想

  • 通常係超市門市同一個品牌做優惠,可以任意配搭唔同口味,而價錢會係一樣,HKTVmall呢一方面就唔得啦。同一件貨我要買兩件一樣先可以享有優惠,想試其他味都唔得,相反百佳就可以。

 

  • 我係送貨單備註咗送貨要先聯絡我,百佳送貨員無打俾我直接撳鐘入咗嚟公司,仲好大聲話百佳,呢一方面真係要改善,唔係人人都想俾人知買咗野送嚟公司。HKTVmall無備註欄,有要求要直接聯絡客服,好似有啲簡單複雜化。HKTVmall送貨員係指定送貨時間前40分鐘送到,撞正食飯時間,佢到咗門口先打俾我,如果我出咗街就無人收。地址我打C座,佢送咗去A座,我要行過去搵佢,感覺好差。相反,士多送貨會先通知後到貨,就唔會有百佳同HKTVmall個情況出現,而且仲好有禮貌。

 

  • 三間網上超市送貨,貨品無爛或遺失,而百佳同士多包裝得好好又乾淨,抵讚!HKTVmall係0包裝,送貨員係個物流膠箱拎貨俾我,貨品上面帶有灰塵,希望下次佢用紙箱pack好一盒先送貨。

HKTVmall

Ztore

PARKnSHOP

 

  • 百佳及HKTVmall都有條碼掃瞄器,打開百佳/HKTVmall App,掃瞄貨品上嘅條碼,可以直接搵到你想要嘅貨品及價錢。暫時士多就無提供呢個服務,要靠人手格價。

 

  • 百佳及士多時不時有優惠碼回饋俾新舊會員,優惠碼限期較長。HKTVmall優惠碼唔多,限期較短,要即買即用。
    去睇睇>>百佳有咩新優惠
    去睇睇>>士多有咩新優惠

 

總結

總括嚟講我個人比較鐘意係HKTVmall買野,貨品種類多、新貨比其他超市上架快、唔使去果欄都買到來自世界各地時令生果,仲使咩出去同人迫?真係要多謝發明網上超市嘅人,等我可以一間shop買晒我要嘅野!

你可能感興趣
2 Comments
  1. Tiffany says

    HKTVmall送貨真係唔得, 身邊好多friend都插…

    1. 睬姥姥 says

      係呀! 我見網上多人插佢, 送到去D貨爛咗, 買急凍貨壞咗。要搵客服睇下點處理, 咁的確幾嬲嘅!

發表提問

Your email address will not be published.