皮革手袋保養方法 (名店職員推介) – 價錢只需港幣$176起

0

上集我為大家介紹過係日本買中古手袋,當你買返去用得好開心嘅時候,不幸地發現個手袋整污糟咗,真係晴天霹靂啦!拎去坊間專門維修手袋嘅地方清潔,閒閒地收你幾百蚊,污垢又唔保證可以清潔走,最後得不償失。見大家都係錫袋之人,而我自己又做咗白老鼠,就寫呢篇文同大家開心Share下啦!

 

名店店員推介

話說我有個Coach綠色手挽袋,因為經常用嘅關係導致手挽位置有啲黑,於是就拎去Coach專門店搵職員抹,抹完真係好似新嘅一樣架! 之但係郁啲有少少污槽我就走去專門店搵人抹,咁我咪好唔得閒? 店員見我咁著緊包包嘅外觀,就推介我買佢啱先用嚟幫我抹嘅Coach皮革護理套裝,套裝內分別有 「Coach leather cleaner 皮革清潔液」 及 「Coach leather moisturizer 皮革保養劑」,由於專門店要賣成$300一Set,所以我最後無買到。

講咗咁耐都未見到佢嘅真章,俾張before同after大家睇,你睇完就會明幾咁有效!

 

皮革手袋清潔及保養方法

其實用法好簡單…

1. 先準備一條乾淨嘅棉質毛巾/平時用嘅化妝棉同棉花棒,

2. 係手袋無咁明顯嘅地方倒少少清潔液落去用毛巾或化妝棉擦一擦,

3. 睇下有冇甩色,如果無就可以集中係手袋污糟咗嘅位置進行大清潔,

4. 清潔完待15分鐘,再係手袋表面用毛巾搽上保養劑,再等15分鐘直至乾透,完成。

啲皮革品千祈唔好等到發咗霉先處理,你會後悔莫及架!建議每三個月定期清潔同搽保養劑一次,可以確保皮質keep住光澤,拎出街用自信爆燈啦!

上述所介紹嘅手袋清潔劑及保養劑雖然係出自Coach品牌,但其實除咗絨面外,係適用於任何皮革產品,幫其他牌子嘅包包清潔一樣無問題! 當然,如果閣下嘅手袋十分昂貴,又或者連你自己都唔知係由咩皮所製成,咁就建議你去返專門店搵職員問下啦~

通常Coach官網響美國Thanksgiving或大時大節都會有促銷優惠,折後只需US $8一支。 (香港賣緊成$300蚊一支) 我印象經代購買呢set套裝都係$176蚊左右,價錢差唔多平一半!如果唔想搵代購咁麻煩,自己去Amazon直接買都得,價錢都依然平過門市。

想知我上次用邊間代購,可以響下面留言俾我,靜靜雞話你知!

你可能感興趣

發表提問

Your email address will not be published.